Austrália aumenta apoiu ba defisiénsia iha Timor-Leste
22 fulan-Agostu 2014
Governu Austrália realsa ninia kompromisu atu tulun Timor-oan sira ho defisiénsia liuhosi anunsia apoiu liután ba tinan rua ba Asosiasaun Defisiénsia Timor-Leste (ADTL) no ninia membru organizasaun sira.
Embaixadór Austrália ba Timor-Leste Sr. Peter Doyle anunsia apoiu estendidu ida-ne’e bainhira halo vizita ba sentru reabilitasaun defisiénsia ida iha Tibar ne’ebé hala’o hosi Klibur Domin, membru ida hosi ADTL.
 |
 |
| Embaixador Australia, Peter Doyle, no Prezidente ADTL, Joaquim Soares, asina akordu iha Kilbur Domin, Tibar. Foto: Embaixada Australia iha Dili | Sylvia fahe nia esperensia hanesan labarik iha eskola. Foto: Australian Embassy Dili |
“Liuhosi ninia dezenvolvimentu lailais, Timor-Leste halo ona mellorias importantes kona-ba hadi’ak padraun moris ba ninia povu,” Sr Doyle hatete. Maibé importante atu labele husik hela ema ho defisiénsia sira iha kotuk. Apoiu ba ema ho defisiénsia sira kleur ona sai nu’udar foku ida hosi Governu Austrália nia programa ajuda. Parseria ida-ne’e ho Asosiasaun Defisiénsia sei tulun hamenus barreiras barak kona-ba asesu ba servisu saúde no edukasaun ne’ebé ema ho defisiente sira hasoru loroloron.”
Sr Joaquim Soares, Prezidente ADTL hatete “Apoiu folin-boot ida-ne’e sei haforsa ADTL atu defende ema ho defisiénsia sira-nia direitu. ADTL sei kontinua defende ho Governu Timor-Leste hodi prioritiza Planu Asaun Polítika Nasionál ba Defisiénsia atu nune’e ema ho defisiénsia sira bele partisipa iha prosesus dezenvolvimentu iha Timor-Leste. ADTL mós husu ba Governu Timor-Leste atu ratifika Konvensaun Nasoens Unidas kona-ba Direitus ba Ema ho Defisiénsia Sira, no atu estabelese Konsellu Nasionál ba Defisiénsia.”
Akordu USD$450,000 asina ona ho Governu Austrália no sei haforsa dezenvolvimentu inkluzivu ba defisiénsia iha Timor-Leste ba tinan rua tuirmai.
Fundus ne’e sei tulun ADTL, organizasaun defisiénsia bootliu iha Timor-Leste, atu haforsa ninia atividades advokásia. Ida-ne’e inklui defende direitus ema ho defisiénsia sira atu iha iha asesu ba servisus saúde, justisa sosiál, edukasaun no empregu iha baze ne’ebé hanesan ho ema sira seluk.